Victoria

Er dette den beste pollensorten av dei alle?

Det kan i alle fall vere vanskeleg å drive kommersiell plommedyrking utan å få eit ganske nært forhold til Victoria.

Dette er ein gammal engelsk sort frå 1800-talet, oppkalla etter dronning Victoria, og etter så mange år er namnet blitt så innarbeidd at det nesten har blitt synonymt med plommer.

Litt som med Van og moreller.

For mange er rett og slett alle plommer Victoria.

Det er dei sjølvsagt ikkje.

Men Victoria har eigenskapar som har gjort at ho framleis står trygt planta i norske frukthagar. Først og fremst er ho ein svært viktig pollensort, og hos oss står det derfor Victoria innimellom rekkjene med andre plommesortar for å hjelpe resten av gjengen med å gjere jobben sin.

Og Victoria sjølv?

Ho treng definitivt ikkje mykje hjelp til å lage plommer.

Dette er avlingsmaskina blant plommesortane våre. År etter år heng trea fulle, og i tal på frukter er det vanskeleg å sjå at nokon av dei andre sortane kjem i nærleiken.

Problemet er at treet ikkje nødvendigvis har lese marknadskrava til fruktstorleik.

Skal Victoria bli stor og flott, må me gjerne tynne vekk noko i retning av ni av ti plommer. Det høyrest fullstendig brutalt ut når ein står framfor eit tre fullt av frukt og begynner å rive mesteparten ned på bakken.

Men alternativet er omtrent ein million plommer på storleik med klinkekuler.

Som eteplomme er Victoria heilt grei. God når ho er skikkeleg moden, men på rein smak har me fleire sortar som snik seg forbi henne i køen. Til konservering og foredling har ho derimot vore ein klassikar i generasjonar.

Og enkelte år får Victoria sjølv vere stjerna.

Når frost, dårleg blomstring eller andre forhold har redusert avlingane på resten av sortane, kan ein framleis stå og sjå på Victoria og lure på om ho i det heile teke fekk med seg at det var eit dårleg plommeår.

Då går ho fint unna som eteplomme også.

Så Victoria står ikkje nødvendigvis her fordi ho er den beste plomma me har.

Ho står her fordi ho alltid stiller på jobb – og samtidig hjelper naboane med å gjere det same.

Dronning Victoria er for lengst historie.

Victoria-plomma nektar derimot å pensjonere seg.

– Gammal engelsk sort frå 1800-talet, oppkalla etter dronning Victoria
– Ein av dei aller viktigaste pollensortane i plommehagen
– Ekstremt riktberande – avling kvart bidige år
– Truleg størst avling av sortane våre målt i tal på frukter
– Må tynnast svært hardt for å få god fruktstorleik
– Grei og god som eteplomme når ho er skikkeleg moden
– Svært populær til konservering og foredling
– Planta innimellom andre sortar hos oss først og fremst for pollinering
– Ekstra verdifull i år der andre sortar gir små avlingar
– Så kjend at for mange er «alle plommer Victoria»
– Har vore med så lenge at det nesten kjennest som menneskeheita alltid har hatt Victoria