Asfari

Asfari er eitt av to gule eple me prøver å få skikkeleg til her på garden.
Og sjølve dyrkinga er eigentleg ikkje problemet. Trea ber godt og epla blir flotte. Den verkelege utfordringa begynner den dagen dei skal av treet.
For gule eple avslører alt.
Eit lite slag, litt for hard behandling under hausting eller ein uheldig tur gjennom handteringa, og merket kjem raskt til syne i det lyse skalet. Dei same små støytane kan nesten forsvinne på eit raudt eple, medan Asfari viser dei fram som om nokon har sett ring rundt dei.
Så her gjeld det å ha silkehanskar på – i alle fall nesten.
Men klarer ein det, får ein til gjengjeld eit heilt vanvittig eple.
Asfari vart introdusert her på garden i 2019 og gjekk ganske raskt inn på Morellmannen si topp tre-liste. Nøyaktig plassering kan variere litt etter dagsforma, men ho er alltid der oppe.
Smaken er fantastisk, konsistensen sprø og saftig, og når frukta er perfekt utvikla, er den reine gulfargen eit syn i seg sjølv. Dette er rett og slett eit eple som på sitt beste nesten spelar i ein eigen liga.
Og det ser ikkje ut til å berre vere dyrkaren som meiner det. Dei som får smake Asfari for første gong, har ein tendens til å adoptere omtrent den same oppfatninga ganske raskt.
Sorten vart utvikla i Belgia på slutten av 1990-talet og kom for alvor inn i norsk dyrking kring 2015. Asfari har også fått ei viktig rolle som eit av dei få gule epla som kan gå gjennom den kommersielle leveringskjeda til fruktlageret.
Men då må dei behandlast deretter.
Fantastiske eple. Berre ikkje mist dei. 😀

– Belgiskutvikla sort frå slutten av 1990-talet
– Introdusert her på garden i 2019
– Eitt av dei få gule epla me dyrkar
– Heilt i toppen på smak – blant Morellmannen sine topp tre
– Sprø, saftig og fantastisk konsistens
– Svært flott og karakteristisk gul utsjånad
– Gir gode avlingar
– Særs utsett for synlege støyt- og slagmerke
– Må behandlast svært forsiktig under hausting og transport
– Eit av dei gule epla som kan leverast kommersielt til fruktlageret