Teknologi skal løyse problem – ikkje skape nye

Vatning når plantene treng det – ikkje berre når klokka seier det

Sif X er vår eigenutvikla vatningscomputer og den delen av teknologien vår som møter den fysiske garden direkte.

Tradisjonelle vatningsanlegg kan vere så enkle som eit tidsur som opnar ein ventil til eit bestemt klokkeslett. Det fungerer – men planter lever ikkje etter ei klokke. Behovet endrar seg med temperatur, luftfuktigheit, sol, nedbør, utviklingsstadium, vekstmedium og kor mykje vatn plantene allereie har fått.

Sif X kan styre vatningssoner og ventilar, byggje program for ulike kulturar og felt og automatisere vatninga slik at svært ulike delar av garden kan behandlast individuelt. På intensive dyrkingssystem kan presis styring vere heilt avgjerande.

Målet er ikkje nødvendigvis å bruke meir vatn. Målet er å bruke rett mengd vatn på rett stad til rett tid. Det gir betre kontroll, mindre unødvendig ressursbruk og opnar for meir avanserte dyrkingssystem. Nye sensorar, funksjonar, styringsmetodar og integrasjonar kan leggjast til etter kvart som behova utviklar seg.

Frå første jordbær til siste eple

Harvest starta med eit enkelt spørsmål: Kor mykje har me eigentleg hausta? På ein fruktgard blir svaret fort komplisert. Frukt kan gå til fruktlager, direkte sal, vidareforedling eller lager. Noko blir pakka om, noko går tapt, og ulike sortar modnar til ulike tider.

Harvest samlar registrering av innhausting, direkte sal, levering til fruktlager, lagerbehaldning, ompakking og andre rørsler av varer gjennom garden. Målet er å kunne følgje avlinga frå ho blir plukka til ho forlèt garden – og forklare kvar kiloen tok vegen.

Samtidig byggjer systemet historikk. Når fleire år blir samla, kan sortar, felt og sesongar samanliknast, og produksjonsdata kan etter kvart sjåast saman med vêr, temperatur og andre forhold. Då går Harvest frå å vere ein digital haustejournal til å bli eit verktøy for å forstå produksjonen.

Arbeidstid utan papir, lister og gjetting

I høgsesongen kan mange menneske vere i arbeid samtidig, ofte på ulike felt og med forskjellige oppgåver. Timereg er systemet vårt for registrering av arbeidstid.

Den tilsette sjekkar inn når arbeidsdagen startar, registrerer pausar og sjekkar ut når dagen er ferdig. Løysinga er laga for å vere rask og enkel nok til å fungere på ein skjerm ute i den verkelege arbeidsdagen – ikkje berre på eit kontor.

For administrasjonen gir systemet oversikt over timar, arbeidsdagar og arbeidsstader. Og når arbeidstid kan sjåast saman med oppgåver og produksjon, blir det mogleg å forstå kor mykje arbeid eit felt, ein kultur eller ein sesong faktisk kravde.

Frå «kva skal eg gjere i dag?» til ein plan alle kan sjå

Ein gard har sjeldan mangel på arbeid. Utfordringa er å vite kva som bør gjerast først. Workplan er utvikla for planlegging og oppfølging av arbeidet på garden.

Oppgåver kan knytast til bestemte felt, rader eller arbeidsområde og fordelast på dei som skal utføre dei. For arbeidaren skal det vere enkelt å sjå kva som står på planen. For den som organiserer arbeidet skal det vere like enkelt å sjå kva som er gjort, kva som står att og kva som må prioriterast.

Oppgåver kan dokumenterast med mellom anna bilete og kommentarar og følgjast opp eller godkjennast når arbeidet er ferdig. Workplan kan dermed bli bindeleddet mellom planlegging, utført arbeid, timeregistrering og produksjonsresultat.

Systemet som passar på systema

Når fleire digitale system blir ein del av den daglege drifta, oppstår eit nytt problem: Nokon må passe på dei også. MSM – Morellmannen Server Manager – er utvikla for nettopp det.

MSM samlar administrasjon, status, backup og vedlikehald på éin stad. I staden for at kvar applikasjon og kvar teneste må følgjast opp separat, gir MSM eit overordna bilete av den digitale infrastrukturen på garden.

Systemet tek vare på sikkerheitskopiar lokalt og eksternt, held oversikt over tenester og gjer det enklare å oppdage problem. Det er kanskje den delen av teknologien ein legg minst merke til når alt fungerer – og det er eigentleg akkurat slik det skal vere.